– Endå eit bevis på at det er krefter som vil ha dei kristne bort frå Gaza, seier Karin Riska som arbeider for Det palestinske bibelselskapet i Jerusalem.

Ingen vart skadde. Eksplosjonen vart høyrd i nabolaget rundt klokka fire om morgonen. Det vart skadar ved inngangspartiet til Zahwa Rosary School som vert driven av katolske nonner. På skulen er det først og fremst muslimske elevar.

To nonner var i husveret sitt rett ved skulen då eksplosjonen kom, ifølgje ein tilsett ved skulen. Dei vart oppskaka av bomba, men ikkje fysisk skadde. Skulerepresentanten ville ikkje ha namnet på trykk, av frykt, melder nyhendebyåret Associated Press.

Politiet skal ha sagt at bomba må ha blitt laga av ein amatør fordi ho var galt skrudd saman og difor gjorde liten skade.

Bomba var den siste i ein serie bombeåtak mot kristne institusjonar i Gaza der det overveldande fleirtalet er muslimar: Det er kring 3.200 kristne i eit område med 1,4 millionar muslimar.

Dette er det andre åtaket på Zahwa Roasary School, det første skjedde i juni i fjor.

Det mest brutale angrepet ramma Rami Ayyad: Han vart kidnappa og drepen i oktober i fjor. Ayyad var tilsett i bibelbutikken til Det palestinske bibelselskapet.

Denne bibelbutikken vart ramma av ei bombe i april i fjor. Ein mindre bombeepisode ramma den same bibelbutikken i februar 2006. Også ein annan skule og KFUM er blitt ramma av angrep inne i Gaza.

Hamas-politifolk seier til AP at dei ser på saka. Men skulen er uroleg fordi politiet ikkje finn dei ansvarlege for bombeangrepa.

– Vi føler oss ikkje sikre her. Det er ingen tryggleik her, seier talskvinna.

Fader Manuel Musallem som er leiar for katolikkane i Gaza, avdramatiserte angrepet og sa at dette er eit angrep gjort av eit enkeltindivid.

Karin Riska er i Jerusalem som representant for Frikyrkja. Ho er uroleg for utviklinga i Gaza.

– Framleis er det kyrkjeleiarar sim seier at det ikkje er problem mellom kristne og muslimar i Gaza. Det kan vere grunnar til ikkje å skapa unødig splitting. Men for dei som vert angrepne er det ikkje oppmuntrande at kyrkjeleiarar ikkje eingong innrømmer at det er eit problem som dei bør gjere noko med, seier Riska.